ਜਲੰਧਰ ‘ਚ ਸਿਟੀ ਇੰਸਟੀਚਿਊਟ ਦੀ ਬੱਸ ਤੇ ਕੰਟੇਨਰ ਦੀ ਟੱਕਰ, ਬੱਸ ਪਲਟੀ – ਵਿਦਿਆਰਥੀ ਸੁਰੱਖਿਅਤ

ਜਲੰਧਰ : ਅੱਜ ਸਵੇਰੇ ਕਰਤਾਰਪੁਰ ਚੌਕ ਦੇ ਨੇੜੇ ਇੱਕ ਵੱਡਾ ਸੜਕ ਹਾਦਸਾ ਹੋਇਆ, ਜਦੋਂ ਸਿਟੀ ਇੰਸਟੀਚਿਊਟ ਦੀ ਬੱਸ ਦੀ ਟੱਕਰ ਇੱਕ ਕੰਟੇਨਰ ਨਾਲ ਹੋ ਗਈ। ਟੱਕਰ ਇਤਨੀ ਜ਼ੋਰਦਾਰ ਸੀ ਕਿ ਬੱਸ ਸੜਕ ‘ਤੇ ਪਲਟ ਗਈ ਅਤੇ ਬਹੁਤ ਨੁਕਸਾਨ ਹੋਇਆ। ਖੁਸ਼ਕਿਸਮਤੀ ਨਾਲ ਉਸ ਵੇਲੇ ਬੱਸ ਵਿੱਚ ਕੋਈ ਵਿਦਿਆਰਥੀ ਮੌਜੂਦ ਨਹੀਂ ਸੀ, ਨਹੀਂ ਤਾਂ ਵੱਡਾ ਜਾਨੀ ਨੁਕਸਾਨ ਹੋ ਸਕਦਾ ਸੀ।

ਮਿਲੀ ਜਾਣਕਾਰੀ ਮੁਤਾਬਕ, ਸਿਟੀ ਇੰਸਟੀਚਿਊਟ ਦੀ ਬੱਸ ਜਲੰਧਰ ਤੋਂ ਕਰਤਾਰਪੁਰ ਦੇ ਵਿਦਿਆਰਥੀਆਂ ਨੂੰ ਲੈਣ ਲਈ ਜਾ ਰਹੀ ਸੀ। ਜਦੋਂ ਬੱਸ ਕਰਤਾਰਪੁਰ ਚੌਕ ’ਤੇ ਪਹੁੰਚੀ ਤਾਂ ਕਪੂਰਥਲਾ ਵੱਲੋਂ ਆ ਰਹੇ ਇੱਕ ਕੰਟੇਨਰ ਨਾਲ ਉਸਦੀ ਟੱਕਰ ਹੋ ਗਈ। ਟੱਕਰ ਦੇ ਨਤੀਜੇ ਵਜੋਂ ਬੱਸ ਪਲਟ ਗਈ ਅਤੇ ਸੜਕ ‘ਤੇ ਭਾਰੀ ਹਾਲਤ ਬਣ ਗਈ।

ਬੱਸ ਦਾ ਡਰਾਈਵਰ ਦਵਿੰਦਰ ਸਿੰਘ (ਅਮਾਨਤਪੁਰ) ਅਤੇ ਕੰਡਕਟਰ ਪਰਮਜੀਤ ਸਿੰਘ (ਖਟਿਕਾ ਮੁਹੱਲਾ, ਕਰਤਾਰਪੁਰ) ਹਲਕੀਆਂ ਸੱਟਾਂ ਨਾਲ ਜ਼ਖਮੀ ਹੋਏ। ਉਨ੍ਹਾਂ ਨੂੰ ਐੱਸਐੱਸਐੱਫ ਦੀ ਸਹਾਇਤਾ ਨਾਲ ਤੁਰੰਤ ਸਿਵਲ ਹਸਪਤਾਲ, ਕਰਤਾਰਪੁਰ ਭੇਜਿਆ ਗਿਆ ਜਿੱਥੇ ਉਨ੍ਹਾਂ ਦਾ ਇਲਾਜ ਜਾਰੀ ਹੈ।

ਹਾਦਸੇ ਤੋਂ ਬਾਅਦ ਆਸ-ਪਾਸ ਦੇ ਲੋਕ ਤੁਰੰਤ ਮੌਕੇ ‘ਤੇ ਪਹੁੰਚੇ ਅਤੇ ਜ਼ਖਮੀ ਡਰਾਈਵਰ ਤੇ ਕੰਡਕਟਰ ਨੂੰ ਬੱਸ ਵਿਚੋਂ ਬਾਹਰ ਕੱਢਿਆ। ਬੱਸ ਵਿੱਚ ਕੋਈ ਵੀ ਵਿਦਿਆਰਥੀ ਮੌਜੂਦ ਨਾ ਹੋਣ ਕਰਕੇ ਵੱਡਾ ਹਾਦਸਾ ਟਲ ਗਿਆ। ਪੁਲਿਸ ਨੇ ਮਾਮਲੇ ਦੀ ਜਾਂਚ ਸ਼ੁਰੂ ਕਰ ਦਿੱਤੀ ਹੈ।